مقال للدكتورة هالة حماد استشاري الطب النفسي
العنوان : مخنوق ومكتئب؟ إزاي تقدر تخرج من الحالة دي؟
المصدر : موقع cairo360
-----------------------------------------------.
للأسف كلنا مرينا بتجربة صعبة خلال اليومين اللي فاتوا. كان أولها تفجير
كمين الشرطة بجوار مسجد السلام يوم الجمعة، وبعده تفجير الكاتدرائية يوم
الأحد في العباسية. أحداث خلت مصر كلها حزينة على اللي بيحصل في أهلها. بما
فيها المحاولات الدنيئة للتفريق بين المسلمين والمسيحيين بشكل غير مقبول.
أحداث زي دي وغيرها كتير ممكن تأثر علينا بشكل سلبي. حياتنا هتكون متلخبطة. إنتاجنا في الشغل هيقل. تركيزنا في كل حاجة هيضعف بشكل ملحوظ.
لكن إزاي نلاقي طريقة نحاول نخرج بيها من المود السلبي اللي في الأجواء
ونتغلب عليه؟ كايرو 360 تواصلت مع د. هالة حماد، استشاري الطب النفسي
بالمركز الاستشاري البريطاني للأطفال والمراهقين. اللي قالت لنا على مجموعة
من النصائح هتخلينا نقدر نتغلب على أي مشاكل بتواجهنا حاليًا، علشان نقدر
نواجه ونكمل.
أول حاجة لازم نؤمن بيها هي أن الشعب المصري مر في
تاريخه بأحداث وكبوات كتيرة. بس دايمًا كان عنده مقاومة لكل اللي بيحصل،
وبيتغلب عليه، ومهم نقتنع إن إحنا أكبر من أي مخطط. ولازم نكون مدركيين
ومنتبهين لأي محاولات تفتيت وتشتيت بتفرض على الشعب المصري، فمهما كان
المخطط كبير إحنا أكبر منه ونقدر نواجهه.
دكتورة هالة حماد بتؤكد
كمان أنه من المهم نركز على طاقة التحدي والرغبة في الإنتاج ونقويها جوانا.
وعدم الاستسلام للإحباط بأي شكل من الأشكال. إحنا نقدر نواجه.. وهننجح
نكمل.
طيب وبالنسبة لطاقة الغضب اللي جوانا؟ دكتورة هالة بتقول إننا
لازم نحول طاقة الغضب والضيق اللي جوانا لطاقة بناء وتعمير. كمان لازم
نفكر بشكل إيجابي في كل الأمور. ونعرف إزاي نحول أي خسارة لمكسب في صالحنا.
ده أكثر وقت لازم نتكاتف فيه، وكل فرد في المجتمع لازم يقوم بدور على أكمل
وجه من غير تقصير، سواء دكتور أو مهندس أو مدرس أو عامل نظافة أو فني أو
عامل بناء. ومش عايزين ننسى أبدًا إننا شعب ابن نكتة. وبالتالي أي مشكلة أو
أزمة بتواجهنا لازم نقدر نضحك في وشها ونهزمها ونعديها.
يومكم تفاؤل.
للرد على استفسارتكم يمكنكم التواصل معنا على الارقام التالية: -
( 22914419 - 01061555586 - 01098564819 ) 022
او عن طريق البريد الالكتروني
dr.halahammad.bcc@gmail.com
ليست هناك تعليقات:
إرسال تعليق